30.06.2021

Демири : Реконструираниот Центар за вработување Куманово е креиран согласно потребите на невработените лица и работодавачите

Директорот на Агенцијата за вработување на Република Северна Македонија Абдуш Демири денеска го посети Центарот за вработување Куманово кој доби нов модерен лик и е комплетно реконструиран.

Центарот за вработување Куманово доби нова фасада на зградата, беше променета кровната конструкција и прозорците, со што се зголеми енергетската ефикасност на целиот објект. Набавен беше и котел на пелети кој значително ќе ги намали трошоците на греење на објектот кој досега се греше на струја, а реновирана беше и водоводната и канализациската мрежа.

-Невработените лица и работодавачите сега услугите за намалувањето на невработеноста и зголемувањето на вработливоста во Куманово можат да ги добијат на место кое е функционално и реновирано согласно стандардите за заштита на животната средина и намалување на ефектите од  аерозагадувањето.-потенцираше Демири.

Директорот на АВРСМ Демири при посетата на ЦВ Куманово потсети дека во тек е реализацијата на Оперативниот план за активни програми и мерки за вработување и услуги на пазарот на трудот за 2021 година и ги повика сите невработени лица и работодавачи од Куманово да го посетат реконструираниот Центар за вработување и да се информираат за можностите кои овој Оперативен план ги нуди.

Реконструкцијата на Центарот за вработување Куманово финансиски е поддржана од Европската Унија преку проектот „ЕУ за млади“ што претставува значајна подршка која придонесува кон подобрување на условите за работа на АВРСМ, а со тоа и за унапредување на состојбата на пазарот на трудот во земјава.

Проектот за модернизација, санација и адаптација на објектот на Центарот за вработување Куманово чини 10.294.492,00 денари.