ANGAZHIMI I PERSONAVE NË PUNË

Me Ligjin e ri për angazhimin e personave në punë, angazhimet afatshkurtra të punës me karakter të përkohshëm dhe sezonal formalizohen dhe regjistrohen përmes sistemit të përmirësuar e-Punë. Regjistrimi dhe çregjistrimi i personave të angazhuar në punë është i detyrueshëm për çdo punëdhënës që angazhon persona për këtë lloj pune.

SI REALIZOHET ANGAZHIMI NË PUNË?

Punëdhënësi është i detyruar që, para fillimit të punës, të regjistrojë angazhimin në punë përmes sistemit e-Punë, si dhe të kryejë në kohë çregjistrimin, në rast se angazhimi nuk realizohet.

Para fillimit të punës, punëdhënësi duhet ta informojë personin e angazhuar për:

• llojin dhe mënyrën e kryerjes së punës;
• vendin dhe kohëzgjatjen e angazhimit;
• kushtet e sigurisë dhe shëndetit në punë;
• orarin ditor dhe javor të punës, si dhe pushimet;
• shumën, mënyrën dhe afatin e pagesës së kompensimit financiar.

ÇKA JU NEVOJITET PËR TË REGJISTRUAR NJË ANGAZHIM NË PUNË?

Për të regjistruar një angazhim në punë, duhet të navigoni në sistemin e-Punë dhe, në seksionin paraqitja e kërkesës”, të plotësoni të dhënat vijuese për personin e angazhuar:

• numrin amëz të qytetarit (NAQ) dhe numrin e dokumentit të identitetifikimit;
• numrin e telefonit ose e-mail adresën;
• numrin e llogarisë bankare.

Për të kompletuar regjistrimin, duhet gjithashtu të zgjidhni cilësinë në të cilën bëni regjistrimin, sektorin e veprimtarisë, llojin e punës, kompensimin total, numrin e orëve të angazhimit, si dhe ndërrimin në të cilin angazhohet personi. Brenda disa minutash, realizohet një angazhim pune formal dhe i rregullt.

CILAT JANË PËRFITIMET?

Me këtë zgjidhje ligjore mundësohet:

• regjistrim i lehtë dhe i thjeshtë i angazhimeve në punë;
• formalizimi i punës sezonale dhe të përkohshme;
• ruajtja e të drejtave të fituara sociale dhe të drejtat e fëmijëve për personat e angazhuar, si dhe e së drejtës për pension pleqërie dhe pension familjar;
• personat e regjistruar si të papunë, të cilët angazhohen në punë, nuk e humbin të drejtën e kompensimit financiar mbi bazën e sigurimit në rast papunësie dhe nuk fshihen nga evidenca e të papunëve; studentët dhe nxënësit nuk i humbin të drejtat e fituara sipas ligjeve të posaçme në fushën e arsimit;
• kompensimi financiar i realizuar nga personi i angazhuar nuk ndikon në fitimin, realizimin apo humbjen e të drejtave të tjera të përcaktuara me ligje të posaçme.

KUSH MUND TË JETË PUNËDHËNËS?

Punëdhënës mund të jetë person fizik ose juridik që, për nevojat e veta, angazhon persona në veprimtaritë vijuese:

• bujqësi, pylltari dhe peshkim;
• objekte akomoduese dhe veprimtari të shërbimit ushqimor;
• veprimtari shtëpiake.

Angazhimi lejohet ekskluzivisht për punë të përcaktuara me ligj dhe të cekura në sistemin për angazhimin në punë.

KUSH MUND TË JETË PERSON I ANGAZHUAR NË PUNË?

Person i angazhuar në punë mund të jetë:

• person që nuk është në marrëdhënie pune;
• person i punësuar ose i vetëpunësuar;
• student;
• person nën moshën 18 vjeç (vetëm për punë të caktuara të cilat janë të lejuara);
• përfitues i pensionit familjar ose të pleqërisë;
• shtetas i huaj me qëndrim të rregulluar sipas ligjit.

Angazhimi në punë nuk përbën bazë për humbjen e të drejtave sociale të fituara.

ÇFARË ËSHTË PUNA E PËRKOHSHME DHE SEZONALE?

• Punë sezonale – punë që kryhet në periudha të caktuara të vitit për shkak të kushteve klimatike ose natyrore, me numër të kufizuar orësh ose ditësh pune.
• Punë e përkohshme – punë që kryhet përkohësisht, herë pas here ose me ndërprerje, në përputhje me kufizimet ligjore.

DETYRIMET TATIMORE DHE TË SIGURIMIT

Ligji rregullon procedurën e llogaritjes dhe pagesës së:

• tatimit mbi të ardhurat personale;
• kontributit për sigurim pensional dhe invalidor;
• kontributit shtesë për sigurim shëndetësor të detyrueshëm në rast lëndimi në punë.

Pagesa e tatimit mbi të ardhurat personale dhe e kontributeve kryhet përmes sistemit të përmirësuar të Drejtorisë së të Ardhurave Publike.